أرشيف لـ19 فبراير, 2012

انا الرئيس التوافقي

تحت تعريف الرئيس التوافقي..
انا الرئيس التوافقي
انا العلماني وانا الفقي
انا العالم والبصمجي
انا المسلم والمسيحي والملحد المفتري
انا الرئيس التوافقي..

انا الرئيس التوافقي
هرضي العسكر وسيدهم حسني
وارضي الاخوان والكتاتني
وارضي الصوفي ويا السلفي
والليبرالي والبرادعي
انا الرئيس التوافقي ..

انا الرئيس التوافقي
انا الي ثائر وانا كنبة
في التحرير حبة والعباسية حبة
تلاقيني في السهلة والصعبة
وف كل حته ازيد محبة
انا الرئيس التوافقي …

انا الي هرضي كل الاطراف
هرضي حماس واسرائيل ما تخاف
وارضي الي سامع والي عمره ما شاف
انا الغني والي مش لاقي العيش الحاف
وانا لي عايش في قصر ومش لاقي دروه ولو بلحاف
ده انا الرئيس التوافقي ….

انا الي موجود بس في الاساطير
انا الي هحقق الي لا الفروق عمله ولا صلاح الدين
انا الي مافيش مني اثنين
ياترى عرفتوني ولا لسه مش عارفين!!!

 

Advertisements

أضف تعليق