انت نازل ليه يوم 27؟!

هو: شخص مش ناوي ينزل يوم 27

انا: نازل ان شاء الله يوم 27

—————————————-

هو: انت نازل يوم 27؟

انا: ايوه ليه….

هو: على فكرة انت شكلك ليبرالي وعلماني وماسوني كمان, وبتكره الاسلاميين والاخوان.

انا بذهول: انا !!! ليه بس يا عم الحج, ده انا مسلم وموحد بالله وبحب الاسلامين جدا وانت عارف كده كويس.

هو: ايوه, عشان انت نازل تلتف على الاستفتاء , وتعمل دستور قبل البرلمان وتخلع المجلس العسكري.

انا: طيب ايه رايك اني معترض على كلامك, ومش عايز ايه حاجة من الي انت قلته, بس برضه نازل.

هو: ازااي يعني؟؟

انا: طيب ممكن تسمع مني..

هو: اتفضل.

انا: بص يا سيدي, صلي بينا على النبي صلى الله عليه وسلم.

هو: عليه الصلاة والسلام.

انا: صحيح انا من الي قالوا يوم الاستفتاء “لا” بس زي مانت عارف انا راضي تماما بنتيجة الاستفتاء , واي حد دلوقتي بيقول انا نازل ضد الاستفتاء وعشان الدستور يبقى قبل البرلمان, وبيقول انه الاستفتاء تم تغييره بالاعلان الدستوري, ارد عليه واقول له صحيح تم اضافة مواد في الاعلان الدستوري ومن حقك تعترض عليها. بس المواد الخاصة بالدستور والبرلمان كانت من ضمن مواد الاستفتاء , يعني دول بالذات مش من حقك تعترض عليهم. يعني لو نزلت تعترض على وضع الدستور بعد البرلمان تبقى انت بتعترتض على الديمقراطية الي كنت بتغني بها من سنين. يعني من الاخر انا باعترض على الي مش عايزين نتيجة الاستفتاء.
اضف الى ذلك ان المجلس العسكري قال انه هيحكم البلاد لغاية الانتخابات ما تنتهي, واحنا وافقنا على كده من الاول وما حدش اعترض,  بس ممكن نعترض على اداء المجلس العسكري , كجهة سياسية تحكم البلاد, وليس كجهة عسكرية, ومش معقول نقول ما نعترضش على ادائه ونوافقه بالكلية والا يبقى استبدلنا فرعون بفرعون ثاني, والمجلس مش معترض اساسا على مناقشة قراراته او الاعتراض عليها.

هو:امال انت نازل ليه وانت بتقول الكلام ده؟؟؟

انا: انا نازل عشان الاتي:

1-      سرعة المحاسبة:عشان سرعة معاقبة الرئيس المخلوع والفاسدين في البلد من عائلته ومن خارجها يعني معقول بعد اكثر من 100 يوم كل الي اتهموهم فيه هي قضايا كسب غير مشروع وشفنا ناس بتطلع منها براءة زي فتحي سرور . فتحي سرور الي افسد الحياة السياسية وفصل للنظام السابق القوانين باخد براءة كده وش. ياعم ده المشير طنطاوي قال انهم اتطلب منهم ضرب المتظاهرين بالرصاص وهما رفضوا!!!!
هيكون مين الي طلب منه كده اوباما مثلا. واما هو عارف مين الي طلب , وهو الحاكم ليه ما يحاكمهوش بتهمة الخيانة العظمى؟؟
ويعني ايه مافيش قانون للفساد السياسي, يعني الكل يطلع بريئ وزي الفل ولا ايه رايك.
وبعدين يا عم عايزين المحاكمات دي علانية زي اي ثورة مش في الخفاء ومستخبية , ويكفيك الي بنقراءه كل يوم عن شكل المحاكمات والي بيتم فيها.

2-      الامن: يرضيك ان الشرطة لغاية دلوقتي مش عايزة تنزل وان تقريبا كل القيادات الي كانت تحت العادلي مباشرة هي هي الي تحت العيسوي , ومديرين الامن الي عليهم تهم بدل ما يتحبسوا ويترموا في السجن, لا قال ايه لسه بيمارسوا مناصبهم بس في اماكن ثانية واحيانا مناصب اخرى بالذمة ده اسمه كلام.
والامن الوطني الي معظم الي فيه هم هم بتوع امن الدولة , يعني تغيير اسم بس, زي ما زمان غيروا اسمه من البوليس السياسي لامن الدولة. يعني يرضيك الكلام ده؟

3-      المجالس المحلية: يعني يرضيك ان المجالس المحلية لسه زي ما هي, وحركة المحافظين الاخيرة الي اتعملت بنفس النظام القديم والي الشعب كله اعترض عليها, ولا حياة لمن تنادي ودن من طين وودن من عجين, ولا السفراء الي بره مصر الي مسوئين صورة مصر وزي ماهم.

4-      الشهداء:طيب وفاكر الناس الي انا وانت كنا بنهتف جنبهم ووقعوا بالرصاص, والي عاشوا معاقين وطارت عيونهم ورجولهم . الناس دي الي عمل فيهم كده لسه طليق,  والوحيد الي اخد تهمه امين شرطة هربان, كبش فداء يعني, من الي بيقدموهم للمدبح ساعة الونقة.
والريس المخلوع بيتعالج في خمس نجوم على حساب الدولة وهما يولعوا بيتعالجوا على حسابهم الخاص ده لو عرفوا يتعالجوا اصلا!!!!

5-      الحرية: ايه رايك في قوانين منع التظاهر وفض الاعتصامات سواء من امام السفارة الاسرائيلية او في كلية اعلام والي حصل في التحرير مع المعتصمين يوم 9 مارس وغيره. هي دي الحرية الي خرجت انا وانت عشانها؟؟؟
في نفس الوقت الي بيعملوا الفتنة الطائفية ما سمعناش ولا اسم متهم واحد ولا شفنا واحد بيتحاسب!!!

6-      الاعلام: ولا الاعلام الي لسه زي ماهو لا قلم زاد ولا قلم نقص, لسه بيطلع الاسلامين والاخوان وغيرهم بعبع. ولسه بيشوه في صورة اي حد ثورجي, ويقطع البرامج على الناس. ولسه تغطيته لاي فعاليات او احداث ضعيفه بشكل عجيب ان لم تكن معدومة.

هي دي ياعم الاسباب الي انا وغيري نازلين عشانها, نازلين نأكد عليها وندافع عنها ونشوفها بتتحقق, وناخد جدول زمني واضح ليها.
على فكرة الاسباب دي تقريبا اتفقت عليها كل الحركات 6 ابريل, وائتلاف شباب الثورة, شباب الاخوان و كفاية …وغيرهم

يا ترى بعد كل الي انا قلته لسه بتسئلني نازل ليه, ولسه هتقعد وما تنزلش؟؟؟؟؟