انت نازل ليه يوم 27؟!

هو: شخص مش ناوي ينزل يوم 27

انا: نازل ان شاء الله يوم 27

—————————————-

هو: انت نازل يوم 27؟

انا: ايوه ليه….

هو: على فكرة انت شكلك ليبرالي وعلماني وماسوني كمان, وبتكره الاسلاميين والاخوان.

انا بذهول: انا !!! ليه بس يا عم الحج, ده انا مسلم وموحد بالله وبحب الاسلامين جدا وانت عارف كده كويس.

هو: ايوه, عشان انت نازل تلتف على الاستفتاء , وتعمل دستور قبل البرلمان وتخلع المجلس العسكري.

انا: طيب ايه رايك اني معترض على كلامك, ومش عايز ايه حاجة من الي انت قلته, بس برضه نازل.

هو: ازااي يعني؟؟

انا: طيب ممكن تسمع مني..

هو: اتفضل.

انا: بص يا سيدي, صلي بينا على النبي صلى الله عليه وسلم.

هو: عليه الصلاة والسلام.

انا: صحيح انا من الي قالوا يوم الاستفتاء “لا” بس زي مانت عارف انا راضي تماما بنتيجة الاستفتاء , واي حد دلوقتي بيقول انا نازل ضد الاستفتاء وعشان الدستور يبقى قبل البرلمان, وبيقول انه الاستفتاء تم تغييره بالاعلان الدستوري, ارد عليه واقول له صحيح تم اضافة مواد في الاعلان الدستوري ومن حقك تعترض عليها. بس المواد الخاصة بالدستور والبرلمان كانت من ضمن مواد الاستفتاء , يعني دول بالذات مش من حقك تعترض عليهم. يعني لو نزلت تعترض على وضع الدستور بعد البرلمان تبقى انت بتعترتض على الديمقراطية الي كنت بتغني بها من سنين. يعني من الاخر انا باعترض على الي مش عايزين نتيجة الاستفتاء.
اضف الى ذلك ان المجلس العسكري قال انه هيحكم البلاد لغاية الانتخابات ما تنتهي, واحنا وافقنا على كده من الاول وما حدش اعترض,  بس ممكن نعترض على اداء المجلس العسكري , كجهة سياسية تحكم البلاد, وليس كجهة عسكرية, ومش معقول نقول ما نعترضش على ادائه ونوافقه بالكلية والا يبقى استبدلنا فرعون بفرعون ثاني, والمجلس مش معترض اساسا على مناقشة قراراته او الاعتراض عليها.

هو:امال انت نازل ليه وانت بتقول الكلام ده؟؟؟

انا: انا نازل عشان الاتي:

1-      سرعة المحاسبة:عشان سرعة معاقبة الرئيس المخلوع والفاسدين في البلد من عائلته ومن خارجها يعني معقول بعد اكثر من 100 يوم كل الي اتهموهم فيه هي قضايا كسب غير مشروع وشفنا ناس بتطلع منها براءة زي فتحي سرور . فتحي سرور الي افسد الحياة السياسية وفصل للنظام السابق القوانين باخد براءة كده وش. ياعم ده المشير طنطاوي قال انهم اتطلب منهم ضرب المتظاهرين بالرصاص وهما رفضوا!!!!
هيكون مين الي طلب منه كده اوباما مثلا. واما هو عارف مين الي طلب , وهو الحاكم ليه ما يحاكمهوش بتهمة الخيانة العظمى؟؟
ويعني ايه مافيش قانون للفساد السياسي, يعني الكل يطلع بريئ وزي الفل ولا ايه رايك.
وبعدين يا عم عايزين المحاكمات دي علانية زي اي ثورة مش في الخفاء ومستخبية , ويكفيك الي بنقراءه كل يوم عن شكل المحاكمات والي بيتم فيها.

2-      الامن: يرضيك ان الشرطة لغاية دلوقتي مش عايزة تنزل وان تقريبا كل القيادات الي كانت تحت العادلي مباشرة هي هي الي تحت العيسوي , ومديرين الامن الي عليهم تهم بدل ما يتحبسوا ويترموا في السجن, لا قال ايه لسه بيمارسوا مناصبهم بس في اماكن ثانية واحيانا مناصب اخرى بالذمة ده اسمه كلام.
والامن الوطني الي معظم الي فيه هم هم بتوع امن الدولة , يعني تغيير اسم بس, زي ما زمان غيروا اسمه من البوليس السياسي لامن الدولة. يعني يرضيك الكلام ده؟

3-      المجالس المحلية: يعني يرضيك ان المجالس المحلية لسه زي ما هي, وحركة المحافظين الاخيرة الي اتعملت بنفس النظام القديم والي الشعب كله اعترض عليها, ولا حياة لمن تنادي ودن من طين وودن من عجين, ولا السفراء الي بره مصر الي مسوئين صورة مصر وزي ماهم.

4-      الشهداء:طيب وفاكر الناس الي انا وانت كنا بنهتف جنبهم ووقعوا بالرصاص, والي عاشوا معاقين وطارت عيونهم ورجولهم . الناس دي الي عمل فيهم كده لسه طليق,  والوحيد الي اخد تهمه امين شرطة هربان, كبش فداء يعني, من الي بيقدموهم للمدبح ساعة الونقة.
والريس المخلوع بيتعالج في خمس نجوم على حساب الدولة وهما يولعوا بيتعالجوا على حسابهم الخاص ده لو عرفوا يتعالجوا اصلا!!!!

5-      الحرية: ايه رايك في قوانين منع التظاهر وفض الاعتصامات سواء من امام السفارة الاسرائيلية او في كلية اعلام والي حصل في التحرير مع المعتصمين يوم 9 مارس وغيره. هي دي الحرية الي خرجت انا وانت عشانها؟؟؟
في نفس الوقت الي بيعملوا الفتنة الطائفية ما سمعناش ولا اسم متهم واحد ولا شفنا واحد بيتحاسب!!!

6-      الاعلام: ولا الاعلام الي لسه زي ماهو لا قلم زاد ولا قلم نقص, لسه بيطلع الاسلامين والاخوان وغيرهم بعبع. ولسه بيشوه في صورة اي حد ثورجي, ويقطع البرامج على الناس. ولسه تغطيته لاي فعاليات او احداث ضعيفه بشكل عجيب ان لم تكن معدومة.

هي دي ياعم الاسباب الي انا وغيري نازلين عشانها, نازلين نأكد عليها وندافع عنها ونشوفها بتتحقق, وناخد جدول زمني واضح ليها.
على فكرة الاسباب دي تقريبا اتفقت عليها كل الحركات 6 ابريل, وائتلاف شباب الثورة, شباب الاخوان و كفاية …وغيرهم

يا ترى بعد كل الي انا قلته لسه بتسئلني نازل ليه, ولسه هتقعد وما تنزلش؟؟؟؟؟

Advertisements
  1. #1 by أحمد عبد الرحيم on مايو 25, 2011 - 3:53 مساءً

    تمام تمام تمام .. تحياتي.. وأصبت ولهذا أنا نازل إن شاء الله يوم 27
    وسوف أضع مقالاتك عندنا مع ذكر رابط المدونه بلنك مباشر مع اسمها.

    • #2 by فالصميم on مايو 26, 2011 - 2:01 صباحًا

      شكرا يا احمد وبارك الله فيك, ده تقدير لا استحقه. فقط ادعوا الله لي ان يلهمني الصواب.

  2. #3 by hane on مايو 25, 2011 - 8:07 مساءً

    هناك تخوف لدى قوى الثورة من حصول التيار الاسلامى على اغلبية فى البرلمان القادم ، وبالتالى سيقوم هذا التيار بوضع دستور جديد قريب من الافكار والاهداف التى يتبناها والتى نعرفها جميعا ، ومن المتوقع ان يفوز التيار الاسلامى بآغلبية البرلمان لان لة شعبية واسعة بسبب توظيفة للدين فى السياسة ، وكان هذا واضحا فى الاستفتاء على الدعديلات الدستورية حيث كان هناك استغلال واضح للدين لاختيار ( نعم) .

    ولذلك ترفض التيارات الدينية اى مشاركة فى الحوارات الوطنية او المظاهرات لانها ترى ان الفترة الانتقالية وما بعدها يسير لصالحها

    • #4 by فالصميم on مايو 25, 2011 - 8:15 مساءً

      وان كان هذا اعتقادا لدى بعض قوى الثورة , الا انه ليس مبررا لعدم مشاركة الاخوان في المظاهرات:
      1- ليثبتوا حسن النية
      2- ليوحدوا الاراء ويدعوا الى الاراء التي يتفق عليها اغلبية الثوار والتي لا تتضمن (مجلس رئاسي, ودستور قبل البرلمان, او تاخير للانتخابات, والتفاف على الاستفتاء)
      3- لكي لا يكونوا اول من شق الصف, فبقيامهم بعمل وقفة يوم الثلاثاء منفردين واعتذارهم عن يوم الجمعة, يعتبر هذا منهم خطوة صريحة لشق الصف

      اضيف على ذلك بان الدستور الذي سوف يوضع سيتم الاستفتاء عليه من قوى الشعب جميعها, والجمعية التاسيسية الواضعة للدستور ستحتوي جميع اطياف الشعب فلما الخوف والتخوين؟

      • #5 by Ahmad Ammar on مايو 26, 2011 - 4:52 صباحًا

        طالما خايفين من الاسلاميين …….لماذا تريدون منهم المشاركة؟!!!حد يجاوب عليا

      • #6 by فالصميم on مايو 26, 2011 - 11:32 صباحًا

        بالعكس احنا مش خايفين من الاسلاميين , ولو قراءت مدوناتي السابقة هتلاقي اني بدافع عنهم, وانا عايزهم ينزلوا عشان الشعب كله يبقى نسيج واحد وننزل مع بعض. يعني ايه الاخوان يعملوا وقفات لوحدهم, على نفس المطالب الي احنا نازلين عشانهنا!!! لماذا الفرقة؟

  3. #7 by محب لبلده on مايو 26, 2011 - 2:35 صباحًا

    الى فعلا نازل يوم 27 ..ومش عاوز حد يلعب فى ودانه ..وعاوز الحقيقة وبس يبقى لازم يشوف ده
    ::::::::::::::: هام جدا ::::::::::::::::::::::

    فيديو ثوره 27 مايو

    • #8 by فالصميم on مايو 26, 2011 - 2:40 صباحًا

      انا نشرت تعليقك من باب الحيادية في عرض وجهات النظر رغم عدم اتفاقي لما ورد فيه شكلا ومضومونا, رغم اني اؤكد لك اني اعرف الكثي والكثير سينزلون الي الميدان للاهداف المذكورة اعلاه وبعدا عن اي شئ له علاقة بالدستور او المجلس الرئاسي, وهؤلاء هم الاغلبية في الواقع وانا منهم.
      وبالمناسبة الدكتور محمد البلتاجي اعلن انه نازل في المظاهرات للتنظيم الاحداث , وشباب الاخوان اعلنوا انهم نازلين, والاحزاب نازله, و6 ابريل, و كفاية, وائتلاف شباب الثورة.
      واتفضل يا سيدي الخبر

      http://www.dostor.org/politics/egypt/11/may/25/43332

    • #12 by خخايف على بلده on مايو 26, 2011 - 2:42 صباحًا

      فعلا لو بتتكلمع الحيادية أنشر تعليقي الاخر

      • #13 by فالصميم on مايو 26, 2011 - 2:43 صباحًا

        هذا ليس بتعليق وانما مقطع فيديو , اذا كان عندك تعليق فاكتبه.

  4. #14 by EHMS on مايو 26, 2011 - 12:47 مساءً

    لم نكن نحلم لسنوات طويلة بما تم تحقيقه في الشهور القليلة الماضية. ولكن لي وجهة نظر اود عرضها مع احترامي لكل اصحاب الرؤى والاتجاهات وان كنت ارى نفسي غير متعمقة في السياسة مثلهم، فانا انسانة مصرية عادية مثلي مثل الكثيرين من ابناء هذا البلد كل ما يحلمون به ان يروا هذا البلد في افضل مكانة يمكن الوصول اليها. الى جميع السادة ذوي الشعبية من جميع الأطياف اذا كان في استطاعة حضراتكم جميعا تعبئة الناس وجمعهم بالملايين للخروج في مليونيات كلما اردتم ذلك فلي اقتراح ارجو من الله ان تساعدوني على تحقيقه: لماذا لا تقومون بتقسيم انفسكم الى مجموعات وتقومون بزيارات لكافة الأماكن التي توقفت وتعطلت نتيجة الاعتصامات و الاضرابات عن العمل لتقوموا باستخدام خبراتكم في اقناع العاملين بهذه الأماكن بالتحلي بالصبر ومعاودة بذل الجهد وادارة عجلة العمل حتى نبدأ في جني الثمار فكيف لنا ان نحصد ونحن حتى متوقفين عن بذل أي مجهود في رعاية ما نتمنى حصاده

    • #15 by فالصميم on مايو 26, 2011 - 2:21 مساءً

      تفضلي بعرض وجهة نظرك طالما لا يوجد بها ما يخالف العرف والادب, ولتعلمي ان النزول غرضه المحافظة على مكتسبات الثورة وليس هدمها

  5. #16 by أحمد عبد الرحيم on يونيو 2, 2011 - 2:11 مساءً

    أستاذنا الكريم .. بعد كرمكم وتفضلكم، قمنا بنشر مقالتين لسيادتكم في مدونتنا. مع ذكر اسم المؤلف: فالصميم، وربط الاسم بمدونتكم الطيبة. وهنا الرابطان:
    http://gabhataw3ya.blogspot.com/2011/05/blog-post_7137.html
    http://gabhataw3ya.blogspot.com/2011/06/blog-post.html

    • #17 by فالصميم on يونيو 3, 2011 - 6:38 مساءً

      استاذ احمد هذا شرف لي.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: